Executive日記——理大讚提升港體壇地位 劍神家朗獲頒榮譽博士

  劍神再升呢!理工大學宣佈,向喺東京奧運摘得金牌嘅「劍神」張家朗頒授榮譽博士學位,同時獲頒榮譽博士學位嘅係中國空間技術研究院研究員楊孟飛。

  理大話,家朗自小對劍擊充滿熱忱,十五歲決定踏上全職運動員之路,多年嚟參與過無數國際比賽,屢創佳績,展現咗無比嘅鬥志和堅定嘅決心,讚揚佢喺劍擊運動得到嘅佳績,提升香港喺國際體壇地位,更喚起港人對體育運動關注,將香港體育發展帶到更高嘅台階。

  另一名獲頒榮譽博士學位嘅係中國空間技術研究院研究員楊孟飛,佢亦係「嫦娥五號」探測器系統嘅總指揮及總設計師。楊孟飛與理大科研團隊緊密合作,支持理大在航天領域的研究工作。理大盛讚,楊孟飛多年嚟致力空間飛行器領域科研工作,對中國探月工程、載人航天及衛星研製等方面貢獻良多,成就備受肯定。

  理大校長滕錦光話,張家朗同埋楊孟飛雖然來自不同專業,但都擁有百折不撓嘅奮鬥精神,敢於「立大志、求突破」,係年輕一代嘅良好典範。

Kelly Chu


hd