Executive日記——疫情下旅遊業漸有起色 第800艘泊郵輪碼頭 雲頂夢號創歷史紀錄

  啟德郵輪碼頭營運可謂幾經風波,疫情前長期被質疑使用率偏低,旅遊業更遭疫情重創,公海遊近期才可以再推出,總算有啲起色。郵輪碼頭嘅營運商環美郵輪碼頭宣佈,昨日創下自二○一三年六月開業以嚟,第八百次客輪停泊成績。Kelly都希望郵輪碼頭以後都順風順水,多啲郵輪嚟香港啦。

        一齊創下歷史時刻嘅郵輪雲頂夢號,亦係經歷長期停航之後,於七月三十日香港客運服務重啟當日,第一艘復航嘅船隻;剛巧亦係雲頂夢號喺香港成功安全復航第一百日,截至昨日為止,已接待逾六萬五千名香港旅客。

        環美郵輪碼頭董事總經理班智榮話真係好高興,能夠同啟德郵輪碼頭最常蒞臨嘅郵輪之一雲頂夢號,一齊慶祝呢個里程碑!根據對經濟效益一般估計,呢次停泊標誌啟德郵輪碼頭,實現初期投資嘅「回本」,期待啟德郵輪碼頭繼續為香港創造更多經濟效益。雲頂郵輪集團總裁朱福明都話好榮幸雲頂夢號成為第八百艘次停泊嘅郵輪,啟德郵輪碼頭不單係雲頂郵輪集團總部所在,更係重要嘅郵輪母港。

Kelly Chu


hd