Executive日記——星島集團舉辦 政商名人齊見證 五界別傑出領袖頒獎禮今晚舉行

  今晚係「2020年傑出領袖頒獎禮」嘅大日子,不經不覺,由星島新聞集團創辦嘅傑出領袖選舉,已經踏入第二十七年喇,Kelly收到風今晚有唔同界別嘅名人,包括高官、政商名人、名媛才俊雲集君悅酒店,一齊見證新一屆傑出領袖嘅誕生!

  Kelly仲向主辦單位打聽過,今晚出席晚會嘅VIP陣容相當強勁,包括有特首林鄭月娥,以及一眾政府司局長,另外仲有陳茂波司長、鄭若驊司長、西九文化區董事局主席唐英年、旭日國際集團主席蔡志明伉儷、星島新聞集團獨立非執行董事蔡加讚伉儷、嘉華國際集團執行董事呂耀華伉儷、香港數碼港董事局主席林家禮博士等等,真係陣容鼎盛,閃爆全場。

  今晚即將誕生嘅傑出領袖,分別嚟自「工商/金融」、「社區/公共事務/環境保育」、「教育/專業/科技及創新」、「體育/文化/演藝」,以及「青年企業家」五個組別。各得獎者都展現卓越幹練嘅精神,更為年輕一代樹立逆境自強嘅榜樣,喺疫情期間,佢哋仍然堅守崗位,展現堅毅和創新精神,持續為香港發展貢獻力量,實在值得表揚。當然,要選出傑出領袖,評審團亦都份量十足,佢哋分別係主席袁國強,委員陳永棋、陳南祿、蔡元雲、梁君彥、李國章、李國棟及梁卓偉。究竟邊五個單位會成為二○二○年傑出領袖?Kelly都好期待呀!

  另外,《星島日報》聽日仲會隨報附送「2020年傑出領袖選舉」特刊,等大家更了解各得獎領袖嘅成功之道,仲可以知道評審有咩評語O添!想知多啲嘅話,仲可以留意下周一至五喺《星島日報》入面「每日雜誌」嘅得獎者專訪,自然可以更了解佢哋啦!

Kelly Chu


hd