Executive日記——七野豬「伏法」惹大迴響 謝影雪:每個生命值得尊重

  漁護署日前喺深灣道將七隻野豬麻醉後人道毀滅,觸發社會熱議。Kelly見到好多藝人、名人都喺社交媒體表示關注,好似港隊奧運羽毛球代表謝影雪認為「每一個生命都值得被尊重」。面對呢個輿論挑戰,環境局局長黃錦星同漁護署署長梁肇輝昨日都出嚟「拆彈」,指外國都以狩獵、陷阱捕獵野豬,會搵適合香港嘅應對方法。

  身為愛狗之人,謝影雪透過社交網站限時動態轉發殺野豬消息,並寫住「無論人類或動物,每一個生命都值得被尊重」,又引用聖雄甘地名言指,一個國家嘅偉大同文明程度,睇點對待動物便知道。居於薄扶林嘅歌手張敬軒亦喺IG限時動態發文,指很享受人類與野生動物一起共存嘅生活,認為解決問題「唔係淨係得殘忍方法」。MIRROR成員AnsonKong亦指「每個生命都應該有權利去生存。」

  面對呢個燙手山竽,黃錦星話全球各大城市都受到野豬問題困擾,為保障市民安全,部份西歐以及北美城市會以狩獵、陷阱捕獵野豬,漁護署會搵適合香港嘅應對方法。梁肇輝就話,冬天前會有更多野豬出嚟覓食,呢段時間有需要行動,誘捕方法不外乎用食物引誘野豬到可控範圍。Kelly都希望署方總結到經驗,平息風波啦!

Kelly Chu


hd