Executive日記——遊人做模特兒打卡 大東山賞芒草現「人龍」

  大家等通關等到頸都長,只好內循環遊玩,正值行山季節,郊外人山人海,就以大嶼山嘅大東山為例,係芒草最多嘅日子,吸引好多市民上山打卡,搞到要排隊踏大石級上落山咁誇張。

  冬天係大東山賞芒草嘅季節。Kelly上周六同朋友由東涌等巴士去伯公坳,點知巴士站已經大排長龍。去到伯公坳下車,沿鳳凰徑嘅大石梯級上山,由於人太多,好似排隊上山一樣!見到好多遊人一邊上山一邊影相,即使人多,但空氣清新,真係好開心。

  上到山頂,係芒草最多嘅地方,好多女仔走入芒草叢中做模特兒,由朋友影靚相,Kelly懷疑唔少芒草被踐踏變扁平!好多人等待日落鳳凰山一刻,以前景芒草,後景係金光餘暉,拍張靚相,可惜當天一大舊雲霧遮蓋鳳凰山,只見到好少晚霞,但景致都好靚。

  此外,每年冬天都有大批市民前往元朗大棠賞紅葉,人多嘈雜,對當地居民帶來不便。十八鄉鄉事委員會前主席梁福元就喺網上發文話,早兩個月已與政府各部門開會討論交通安排,疏導遊人,佢呼籲市民忍讓同守法,減少對村民嘅滋擾咁話。

  Kelly絕對支持,大家玩也要顧及他人呀。

Kelly Chu


hd