• 2022年1月23日 星期日
  • 20º
  • 84%
  • facebook
  • Weibo
  • RSS

Executive日記——張家朗衣錦還「校」 獲發250萬獎金

  「劍神」張家朗摘下東京奧運一面金牌,全城鼓舞!佢昨日衣錦還「校」,返回母校林大輝中學出席頒獎典禮,獲逾二百五十萬元獎金,校方特別將佢在學時嘅課室命名為「張家朗課室」,係繼「師兄」世界單車冠軍郭灝霆、港隊乒乓「一哥」黃鎮廷後,第三位留名母校嘅校友。
  林大輝中學舉行「傑出運動員獎勵計劃」頒獎典禮,同時有「張家朗課室」揭幕儀式,一眾校友港隊代表獲頒發獎金,其中張家朗以奧運金牌與團體賽第七名嘅佳績,獲頒逾二百五十萬元獎金。校監林大輝話,多年嚟有好多學生為體育生涯奮鬥,佢對此感到自豪,話體育發展不進則退,希望政府持續大力支持,以免今日嘅成果成曇花一現。家朗感謝校方支持,將親筆簽名嘅戰衣送贈母校,又勉勵師弟妹,「大家有睇八強我落後好多,但未去到最後一刻,未知輸贏,大家都要堅持努力。」
  再次踏入校園嘅家朗發現,學校有不少轉變,好似增添咗足球場等,佢形容時間過得好快,畢業就好似昨天嘅事。對於校監林大輝曾揚言若學生奪得奧運獎牌會「包做業主」,家朗就話當時不在場,唔清楚咁話,又話目前專注比賽,暫時儲起獎金。而另一校友、年僅二十歲嘅全運會單車公路賽冠軍李思穎亦獲頒二十萬元獎金。
  至於同為林大輝中學校友、奧運空手道銅牌得主劉慕裳,亦獲母校頒發六十二萬五千元獎金,同時佢在學時嘅課室亦會以佢為名,不過,校方同Kelly講,因為Grace宜家唔喺香港,惟有等佢返到香港再進行命名儀式!
Kelly Chu







hd