Executive日記|海關「一姐」何珮珊 旗袍禮服亮麗

女性撐起半邊天,呢句說話喺香港好啱聽,大家不難發現,商場女強人多不勝數,政府高官中亦不乏女將,包括海關關長何珮珊,佢位列特區政府問責官員名單之列,上場之後,即刻發揮女首長嘅獨特魅力,首創以旗袍作為女性官員嘅會所禮服,最近出席官式活動,引來艷羨嘅目光。紀律部隊中人話俾Kelly知,警方、消防、入境處、海關、飛行服務隊等紀律部隊,主任級以上嘅職位,可以使用會所,參加宴會同各式活動。自香港開埠以來一百多年以來,各紀律部隊都只有男性出任主任級,各紀律部隊會所都係男性天下,佢哋出席活動時,會自資造一套會所禮服(Mess Kit),肩膊上會縫上代表官階嘅徽章,醒神又有型。

直至六十年代尾,警隊先至出現第一位女督察,但佢就無學男性自製會所禮服,而係着晚禮服出席會所宴會。呢個情況直至葉劉淑儀喺一九九六年出任入境處長,先至有改變,佢首創上身穿西裝外套,下穿長褲,肩上縫上官階嘅Mess Kit,開咗風氣之先,其他紀律部隊嘅女性紛紛跟隨。海關關長何珮珊來一次開創性嘅發展,佢早前出席交通安全隊周年晚宴時候,穿一襲旗袍禮服,特別之處,喺肩上縫上關長嘅徽章,胸上掛上奬章,旗袍顏色綠同黑,依足海關嘅傳統。據小妹八卦到,呢件Mess Kit仲係設計師余嫿設計嘅,盡顯美態。
Kelly Chu

 
更多文章