• 2022年5月20日 星期五
  • 29º
  • 65%
  • facebook
  • Weibo
  • RSS

Executive日記|大圍小館玩味中菜 榮登米芝蓮

為食之人留意啦,《香港澳門米芝蓮指南 2022》昨天公佈平民美食榜,今年香港有七間食肆新上榜,小食包括刈包、蚵仔煎、粢飯、豆腐等,美饌就有鹵鵝飯、燒鵝同被喻為「包含些許幽默感」嘅大圍小館粵菜。

Kelly對大圍小館好有興趣,據說老闆自小喺大圍長大,見區內冇合心水嘅中菜,招攬咗一班老師傅坐鎮打江山,炮製古法點心,包括仁稔蒸排骨、煎糯米雞、灌湯餃,日日新鮮自家出品。除咗傳統味道外,仲玩創新,推出蘿蔔糕炒蟹、元蹄煀乳鴿等,吸引到米芝蓮嘅神秘試食員垂青。

米芝蓮又讚揚有七十年歷史、家喻戶曉嘅陳勤記鹵鵝飯店,話佢哋美味的鹵鵝贏得無數美食愛好者嘅心。而粵式燒鵝專家天鴻燒鵝嘅招牌燒鵝,每日從佛山運送鵝隻來港,經醃製、烤製至完美後,熱騰騰上桌,小妹聽完都流口水。

另四間提供小食嘅小店,被讚譽為食客提供療瘉美食,包括倆口小吃嘅刈包,吸引忠實熟客回訪。丁爸食府台灣嘅蚵仔煎、蛋餅同滷肉飯,都有好多擁躉。滿堂樂嘅招牌粢飯堅持即叫即做,新鮮又美味,Kelly亦好鍾意佢哋嘅酸辣湯同鹹豆漿。而公和荳品廠嘅自製豆腐,出名豆香濃郁,小妹經常食。
Kelly Chu

hd