Executive日記|大紅系列配藍外套 變身時尚雜誌封面女郎 李慧詩高呼「我要Sexy一點」 - KellyChu

香港運動員曝光率愈嚟愈高,之前有「劍神」張家朗成為品牌代言人,「牛下女車神」李慧詩(Sarah)都一改硬朗形象,變身時尚雜誌封面女郎。佢喺facebook直言「我要Sexy一點」。Kelly睇到佢呢批相,都覺得女車神原來喺時裝上有好高塑造元素。

李慧詩喺fb指,去年11月尾收到邀請,要為一本時尚雜誌拍攝封面,工作人員喺拍硬照前兩星期見佢,想知道佢嘅喜好,有乜嘢想試,佢話「我要Sexy一點」。體院同事甚為緊張,拍照前審批,已經有啲服飾看似太暴露唔獲考慮;又有啲相,拍完後不能用。

Sarah就好鍾意今次造型,如甚少選嘅黃色衣裳;大紅系列配藍色膠外套,即刻好巴黎feel;着花花裙更加係少見,笑言以為自己進入愛麗絲夢遊仙境。另一造型係加了兩件束腰帶嘅造型,感覺時尚許多,但代價係着太耐會呼吸困難。而今次可以着boots又可着高跟鞋影相,「做喜歡的事,就會忘了疲憊感」。

網民大讚喜歡佢呢個新形象,以及佢充滿自信嘅笑容。
Kelly Chu
更多文章