KellyChu - 慶特區25周年推攝影比賽 獎你免費搭1年 天星弘揚香港「人、情、味」|Executive日記

為咗慶祝香港特別行政區成立廿五周年及迎接天星小輪邁向一百廿五周年,天星小輪有限公司宣佈,舉辦「天星小輪『人、情、味』攝影比賽」,比賽獎品包括酒店兩人住宿、免費乘搭天星小輪一年,非常吸引。Kelly亦決定參加,用畫面訴說天星小輪嘅香港故事!

今次比賽組別,分為硬照組及短片組,前者每位參賽者可提交最多三張硬照,後者每位參賽者只限提交一段短片,年滿十六歲人士於即日起,可以透過天星小輪網站報名參加啦,參賽者仲可以參加多於一個組別,全球攝影愛好者準備好未?今次嘅評審團星光熠熠,成員包括資深傳媒人李純恩、著名時裝設計師鄧達智、陳慶嘉導演,以及紐約國際電視電影節評審黃英飛等,位位經驗豐富,能夠得到他們認同,相信都係對自己嘅肯定。

提到比賽,不得不提獎品。兩組均設有金、銀、銅獎各一名和優異獎五名,得獎者的獎品,包括有香港美利酒店住宿、天星小輪「一比一百一十」限量版模型乙隻,連幸運號碼證書,以及免費乘搭天星小輪一年等等;作品仲有機會喺中環、尖沙咀及灣仔天星碼頭巡迴展出,非常吸引!想參加嘅朋友要開始行動,因為作品下月三十一日就會截止遞交。

天星小輪有限公司總經理周卓賢話,天星小輪是香港人的集體回憶,仲提到「希望透過舉辦是次比賽,收集全球的參賽作品,多角度展現香港和天星的『人、情、味』,以及兩者密不可分的歷史意義,一起說好:香港故事!」
Kelly Chu
更多文章