任睇No.1
  • 26º
  • 92%
  • 2022年8月11日 星期四

KellyChu - 同小學生打欖球 順便宣傳七欖盛事 財爺好波 一舉兩得|Executive日記

多做運動身體好,周日(七日)更係「全民運動日」。財政司司長陳茂波昨日喺社交平台上載影片,提到自己日前「與一班小學生一齊打波,跑下跳下,享受做運動的樂趣」,順便宣傳十一月嘅香港國際七人欖球賽,一舉兩得。

財爺到訪香港普通話研習社科技創意小學,參與欖球隊嘅訓練。財爺加入藍隊,與紅隊比賽,由起跑、傳球、攔截球員,姿勢十足,好享受與學生玩樂聊天嘅時光。佢賽後形容欖球運動非常刺激,自己曾經到現場觀看「香港國際七人欖球賽」,氣氛好正,政府全力促成此項盛事再次喺香港舉行,展現香港活力嘅一面。香港欖球總會早前宣佈,將會喺十一月四至六日復辦七欖賽,係事隔三年半再度舉行呢項國際賽事。

「全民運動日」係康文署每年舉辦嘅活動,當日開放大部份康樂設施畀市民免費使用,鼓勵恆常運動。Kelly都覺得呢類有益安排,多搞無妨啊。而政府本周起,亦推行「星期五便服日」,政府僱員逢周五可穿運動服或便服上班,以鼓勵佢哋喺公餘時間,多參與康體活動。公務員事務局局長楊何蓓茵昨日亦喺網上發相宣傳,以身作則,自己同職員都穿便服上班。
Kelly Chu

hd