KellyChu - 星島2021傑出領袖矚目誕生 全城政商名人耀目見證|Executive日記

魁首振翅,創領先河。由星島新聞集團主辦嘅「2021年傑出領袖選舉頒獎晚宴」今晚喺君悅酒店隆重舉行;全城都相當期待邊五個單位或人士脫穎而出,成為新一屆嘅傑出領袖,Kelly都好緊張呀!

除咗得獎領袖名單備受注目外,出席嘉賓嘅陣容亦不容小覷,當中包括行政長官李家超先生、財政司司長陳茂波先生、律政司司長林定國先生及一眾政府局長高官,另外仲有嘉華國際集團有限公司執行董事呂耀華伉儷、香港應用科技研究院有限公司董事局主席李惠光先生等等,相信屆時必定星光熠熠,耀目全場。

Kelly數吓手指,原來傑出領袖選舉已經踏入第二十八屆,歷屆嘅得獎領袖對香港、內地,以至全球作出極大貢獻,更成為年輕人嘅榜樣,成就備受肯定。今年大會亦一如既往選出「工商/金融」、「社區/公共事務/環境保育」、「教育/專業/科技及創新」、「體育/文化/演藝」,以及「青年企業家」等五個組別嘅精英。各界領袖喺疫情下發揮堅毅鬥志,啟迪後進,同時凝聚社會,團結港人,持續發放正能量,備受稱許。

要選出傑出領袖,當然唔少得一班專業評審團啦,今年繼續由資深大律師袁國強先生擔任「2021年度傑出領袖選舉」評審委員會主席,連同陳永棋、陳南祿、梁君彥、區璟智、梁卓偉、李國章及李國棟擔任評審委員,齊齊選出新一屆嘅傑出領袖,絕對係勞苦功高呀!

如果想知道各傑出領袖嘅成功之道,以及評審對佢哋嘅評語,就要留意聽日隨《星島日報》附送嘅「2021年傑出領袖選舉」特刊喇!Kelly仲知道下周一至五《星島日報》嘅「每日雜誌」專欄會有圖文並茂嘅得獎者專訪,記得留意喇!
Kelly Chu■評審委員開會,選出新一屆傑出領袖。
■評審委員開會,選出新一屆傑出領袖。

hd