KellyChu - 旅遊達人項明生好傷心 大郵輪公司一去不返 「當香港死咗」|Executive日記

香港實施0+3,即時掀起外遊熱潮,但海外旅客幾時有興趣重遊香港,就要等政府幾時行「0+0」啦。即使香港日後全面撤銷入境隔離措施,但好多旅遊基建要等時間先至恢復元氣,例子之一,就係全面陷入停頓嘅郵輪業。連旅遊達人項明生都話,所有大郵輪公司都離香港而去,形容「當香港死咗」!

避疫旅居台灣兩年嘅項明生,近日回港探親。佢話,全球旅遊業開始復興,佢正探索環球郵輪遊嘅可能性,但發現冠達、公主、皇家加勒比等郵輪公司喺二三至二四年都已經冇將香港列入環球郵輪中途泊港之一,大歎「好傷心」。


佢話,跟相熟嘅船長傾偈,人人讚香港港口係「世上最靚」,但現在多間郵輪公司都「當香港死咗」。海外旅客如欲乘坐環球郵輪,會到東京、新加坡、倫敦等地。

由於香港開關遲過人,而郵輪公司早喺兩年前就計劃未來航線,「唔會等香港」,亦「唔會撳個掣就返嚟」。項明生希望政府能繼續放寬入境限制,令香港唔會被國際旅客遺忘咁話。
Kelly Chu
更多文章