KellyChu - 指「0+3」影響生意 「噏得出就噏」 張宇人話有人「扮代表」飲食業界爆罵戰|Executive日記

飲食界立法會議員、行會成員張宇人喺社交平台出咗條片,不點名批評飲食業內有人「扮代表」, 話「0+3」影響飲食業,形容呢個講法「全無科學根據」、「噏得出就噏」,即時惹來業內人士反駁,稻苗學會榮譽會長黃傑龍回應話:「我幾肯定佢唔係鬧我」、「如果俾佢鬧吓就有生意,我日日俾佢鬧都冇所謂」。香港餐飲聯業協會會長黃家和亦同Kelly講:「我唔知佢(張宇人)係指邊個,但我就絕對唔係要扮乜乜物物。」

張宇人喺片段中不點名批評有人「扮飲食業界代表」,話「0+3」影響業界生意,強調「我呢個廿幾年嚟飲食業嘅代表只此一個,可以話畀你聽我完全唔認同呢啲全無科學根據、無數據、噏得出就噏嘅言論。」佢仲話,港人過去外出旅行,未見影響飲食業生意,「點解呢?係咪入嚟香港(的人)一定少過出去?係咪香港人出咗去使晒錢,返嚟就冇錢食嘢呢?」佢指政府放寬「0+3」後,各行各業都受惠,「最多無大增長,一定唔會唔見生意。」

翻查資料,黃傑龍同黃家和都批評過「0+3」會影響食肆生意。黃傑龍昨日喺電台節目回應:「我幾肯定佢唔係鬧我,就算係我都唔介意,因為佢係長輩俾長輩鬧好平常。其實我都想佢講得啱,最好生意冇影響。如果俾佢鬧吓就有生意,我日日俾佢鬧都冇所謂。」黃家和就同Kelly講,「我唔知佢(張宇人)係指邊個,但我就絕對唔係要扮乜乜物物」,強調維持個人睇法,就係「0+3」會拖累全港經濟。
Kelly Chu黃家和
黃家和
黃傑龍
黃傑龍

hd