KellyChu - 超過120件收藏首次亮相 列支敦士登皇室珍藏展覽|Executive日記

香港故宮同世界聞名嘅列支敦士登皇室收藏宣佈,今年十一月九日至明年二月二十日期間,會喺香港故宮舉辦「藝苑尋珍──列支敦士登皇室收藏名品」特別展覽。今次展覽中,列支敦士登皇室珍藏會首次喺香港亮相,超過一百二十件珍品。最矚目嘅展品包括十七世紀巴洛克時期的歐洲藝術巨匠彼得.保羅.魯本斯同安東尼.凡.戴克嘅經典傑作。機會難得,Kelly聽完都好想到場參觀,鍾意藝術嘅市民唔好錯過!

「藝苑尋珍」展由香港故宮同列支敦士登皇室收藏嘅專家團隊共同策劃,策展團隊從三萬多件王室藏品中,精心挑選逾一百二十件珍品,種類涵蓋油畫、版畫、掛氈、雕塑同裝飾藝術等。透過呢啲藝術傑作,觀眾既可了解列支敦士登親王對藝術嘅熱愛,亦可探尋中國同歐洲過去幾個世紀以來喺藝術同建築領域嘅交流。

而喺列支敦士登皇室收藏中,最珍貴嘅藏品,莫過於魯本斯同凡.戴克嘅作品。魯本斯經常為歐洲皇室成員作畫,被譽為「畫家中嘅王子、王子們嘅畫家」;凡.戴克就係魯本斯嘅合作者,曾被英國國王查理斯一世任命為宮廷畫家。佢哋嘅作品有極强表現力、氣勢宏偉、色彩豐富,而構圖充滿動感。今次展覽將呈獻兩位巨匠共三十六幅重要作品,包括《馬爾斯與雷亞.西爾維亞》、《發現嬰兒厄里克托尼俄斯》以及《瑪利亞.德.塔西斯像》等,係香港歷年來對兩位大師名作最大規模嘅展示。
Kelly Chu ■《瑪利亞.德.塔西斯像》。
■《瑪利亞.德.塔西斯像》。
更多文章