KellyChu - 捲起衣袖身體力行 籲市民盡早接種 李家超率政府團隊 打流感針|Executive日記

政府防疫注射計劃同疫苗資助計劃已經正式展開,特首李家超昨日就同政府團隊一齊捲起衣袖,齊齊接種季節性流感疫苗。李家超接種完之後,就話新冠疫情兩年幾以嚟,大家對流感嘅免疫力下降,如果同時感染新冠病毒,就可能出現嚴重併發症,甚至死亡,所以呼籲市民盡早接種季節性流感疫苗!Kelly平時都好少感冒,但聽到特首咁講,呢幾日都打算抽個時間去接種。

李家超喺社交媒體facebook發文話,新冠疫情至今已經兩年幾,長期嘅防疫措施令大家對流感免疫力有所下降,而市民一旦患上流感,就有機會引致嚴重疾病;如果同時感染流感同新冠病毒,就可能出現較嚴重併發症,甚至死亡。所以,相較往年,市民提前接種季節性流感疫苗更為重要。佢又提醒,即日起,五十歲或以上嘅香港居民,喺社區疫苗接種中心接種新冠疫苗嗰時,可以即場選擇免費接種流感疫苗。所以各位市民,尤其係長者、幼童等流感高危群組,記得盡早接種季節性流感疫苗,保護個人健康。
Kelly Chu
更多文章