專欄

KellyChu - 俄藝術家：新牆好快準備好貓屋無「前路」作者推新作｜Executive日記

Executive日記 - KellyChu 2022-11-14 列印

大帽山打卡聖地「貓屋」因地勢陡峭，前往嘅通道日前畀地政總署用膠帶圍封。不過Kelly就發現，原來「貓屋」噴漆作者、俄羅斯藝術家Vladimir一直緊貼時事，知道「貓屋」通道被封嘅事，形容係「壞消息」，不過就喺Instagram宣佈一則好消息：好快就有新嘅貓咪作品面世，但就要先賣個關子，等佢畫完咗先話畀大家知地址喺邊。

Vladimir係IG用英文發動態話：「各位朋友，有一則壞消息，有人封閉咗通往《盒子裏嘅貓》嘅道路」；但同時亦有好消息，因為佢畫緊另一幅貓咪噴漆作品：「好消息，新牆好快準備好」、「PS：等我完成之後，就會同大家分享地址」。Vladimir仲上傳咗兩張相，顯示佢畫開嘅全新作品。

Vladimir仲喺IG上載影片，分享之前畫大帽山「貓屋」嘅經歷，只見佢選好所需嘅噴漆之後，就開始行上大帽山，之後就喺位處大帽山約八百七十米高嘅荒廢小石屋牆身上，日以繼夜咁創作。最終一間破舊小屋，搖身一變成為觸動心靈嘅「貓屋」。
Kelly Chu