警隊呢幾年絞盡腦汁吸納人才，今個財政年度計劃招募二百四十名見習督察同一千五百五十名警員，除咗月前舉行「招募體驗日」，保安局局長鄧炳強昨日仲「大晒冷」，親身上陣拍片介紹警隊今年全新引進嘅國產裝甲車「劍齒虎」，形容全車精鋼製造可以防彈，「敲落去哐哐聲」，而「如果你想同我哋嘅『劍齒虎』並肩作戰，請你嗱嗱聲打紙加入警隊」。
鄧局長喺FB上載影片介紹「劍齒虎」，形容：「電車叮叮聲駛過，私家車呠呠聲走過，而呢架車就係冚冚聲咁行過，因為佢就係最新一代裝甲車『劍齒虎』！」。佢介紹話，「劍齒虎」全身採用精鋼製造，可以防彈，「敲落去哐哐聲」。車頂裝有多孔發射器，可同一時間發射十五粒催淚彈或者防暴彈，「打出嚟轟轟聲」。
局長又話，「劍齒虎」車尾安裝360度全方位紅外線鏡頭，可以「嚓嚓聲」清晰拍低六百米以內人樣。車輪則具有防爆胎功能，就算「畀磚頭或者汽油彈扔到砰砰聲，一樣行，沒事」。最後局長都不忘提醒：「如果你想同我哋嘅劍齒虎並肩作戰，請你嗱嗱聲打紙加入警隊」。
翻查下資料，其實「劍齒虎」今年七一已經試過喺重點區域同市區高調巡邏。唔知聽完局長介紹，大家有沒有「嘩嘩聲」呢？
Kelly Chu
t
;){kind=link}
;){kind=link}
;){kind=link}
;){kind=link}
;){kind=link}
;){kind=link}