KellyChu - 隱身魚塘 日日新鮮 鳳眼藍花怒放 元朗「秘境」透浪漫|Executive日記

鳳眼藍花期一般係五月或者十月,不過Kelly發現,今年到十一月中,元朗盛屋村嘅鳳眼藍花依然怒放,一片藍色花海吸引大批市民前往大影特影,誓要抓緊「鳳眼藍嘅尾巴」。呢片淡紫藍花海咁浪漫,唔少網民都大呼「好正」,大家仲唔趁呢個周末去感受一下!

盛屋村鄰近元朗工業邨,北面有大片魚塘,對面就係高廈林立的深圳,而企係魚塘往北望,就見到櫛次鱗比的深圳天際線。就喺高樓簇擁下,就有大片怒放嘅淡紫藍色花海,有睇過嘅市民仲話,鳳眼藍每日都有新一批生出,每日變化都唔同,浪漫到不得了。

翻查資料,原來鳳眼藍原產南美洲亞馬遜河流域,非常粗生,屬入侵物種,生長時會快速覆蓋水面,令水中生物死亡,破壞河水生態及堵塞去水道,被列入世界一百種具破壞力的入侵物種之一。由於早期新界農民種植鳳眼藍作餵飼家豬之用,故又名「豬乸蓮」。

另外,唔少人反映唔係好識去盛屋村,Kelly就精選一條路線畀大家:港鐵屯馬線元朗站—>轉乘輕鐵到大棠路站—>到位於福康街的小巴總站乘搭74號小巴—>盛屋村總站落車—>沿路步行入魚塘範圍。回程時,乘74號小巴在中途的港鐵屯馬線朗屏站下車,轉鐵路回市區就得。
Kelly Chu■元朗盛屋村十一月中鳳眼藍花依然怒放。
■元朗盛屋村十一月中鳳眼藍花依然怒放。

hd