KellyChu - 展示香港經典少女漫畫時代印記 《13点》郵票下月6日發售|Executive日記

郵票迷注意喇!香港郵政宣佈,風靡一時嘅經典少女漫畫「《13点》」為題嘅特別郵票同相關郵品,會喺十二月六日推出發售。Kelly睇過呢款特別郵票嘅相,覺得設計清新別致,到時都打算買返套珍藏,愛集票嘅你又點可以錯過!

《13点》自六十年代開始出版,由著名女漫畫家李惠珍創作,係香港首本以女性為對象嘅漫畫。而為咗展示呢部香港經典少女漫畫嘅時代印記,香港郵政就以「《13点》」為題,發行一套六枚郵票、兩張郵票小型張及相關集郵品。呢套特別郵票同相關郵品,十二月六日起就會喺各郵政局同「郵購網」發售。不過貼有特別郵票嘅已蓋銷首日封同珍藏套裝,就只限喺集郵局發售。

李惠珍透過漂亮獨特嘅筆觸,富幻想力嘅故事,將流行文化注入《13点》裏面,使其成為嶄新風格嘅漫畫,引起當時讀者對時尚生活嘅嚮往。女主角「13点」獨立、新潮同富正義感,為大眾帶出耳目一新嘅女性形象,加上作者創作千變萬化嘅時裝,令《13点》喺香港漫畫奠定一個標誌性地位。
Kelly Chu
更多文章