KellyChu - 沉浸式感受中華文化之美 康文署送大禮 志蓮靜賞譚盾新作|Executive日記

樂迷又有福喇!康文署下月將免費呈獻國際著名音樂家譚盾嘅最新作品「志蓮淨苑‧聽視界」,呢個節目結合沉浸式實景演出、聲音花園、講座、示範同展覽等元素,將志蓮淨苑嘅建築群打造成如夢如境嘅場景,展現大自然、藝術同中華文化之美,一次過滿足視聽享受,大家仲唔快啲報名!

「志蓮淨苑‧聽視界」有四個主要節目,十二月三至十一日分別舉行,包括淨土‧蓮Immersive實景秀、「建築與音樂」講演、「聲音花園」及「敦煌壁畫中的樂器復原」等。Kelly就同大家推介香港首演嘅《淨土‧蓮》,譚盾喺作品裏面用沉浸式實景呈現,以夕陽時份嘅志蓮淨苑庭院與園林作為舞台,演出糅合建築與音樂、敦煌壁畫與元宇宙、實景電影與戲劇舞蹈元素,為觀眾帶嚟一趟洗滌心靈嘅體驗。呢幾個節目都係免費入場,不過《淨土‧蓮》同「建築與音樂」講演,就要今朝十點起喺網上預先登記,座位有限,額滿即止。

「志蓮淨苑‧聽視界」係香港特區成立二十五周年的慶祝活動之一,由馬會撥款六億三千萬元獨家贊助舉行。
Kelly Chu

hd