KellyChu - 「詐騙廣告」海報 推優惠利誘上釣 全民反詐大測試半月30萬人中計|Executive日記

近年詐騙案數字不斷攀升,警方反詐騙協調中心最近就開展咗一個名為「全民反詐大測試」嘅大型防騙宣傳活動,自製「詐騙廣告」海報,用各種優惠吸市民掃描海報上嘅二維碼,點知短短半個月,就有三十萬人「中計」!Kelly就覺得,大家都要提高警覺,唔好貪小便宜!

「全民反詐大測試」活動首階段喺上月十六號展開,警方設計咗四組「詐騙廣告」海報,包括送免費機票、超市禮券、主題公園入場券同交友脫單等,刊登喺多個平台,包括社交平台、巴士車身、免費報紙頭版、旺角戶外大型廣告牌等,吸引市民掃描海報上嘅二維碼。掃碼之後,其實會馬上連接到中心預設嘅防騙宣傳網站。結果短短半個月,就有近三十萬人掃描瀏覽。

警方話,唔少市民都會覺得自己唔會俾人呃,但結果顯示,大眾好易俾眼前嘅着數利誘,最終墮入騙網。警方強調,騙徒可以透過互聯網、社交平台接觸受害者,真係無處不在,希望透過今次活動,提高大眾嘅防騙意識。

活動今個月會開展第二階段,例如今日就有兩架「防騙號」帆船,同一輛宣傳巴士喺全港各地巡遊;之後亦會有五輛宣傳車走訪全港各區,向市民派發防騙宣傳品。
Kelly Chu

hd