專欄

KellyChu - 港鐵推退役列車保育計劃「烏蠅頭」延續第二生命｜Executive日記

Executive日記 - KellyChu 2022-12-03 列印

俗稱「烏蠅頭」嘅MLR中期翻新列車，自從東鐵線過海段通車，就已經全數退役，不過唔代表佢嘅使命會就咁完結。港鐵宣佈會同社區夥伴合作推動「退役列車保．傳計劃」，透過原卡保育、循環再用同埋升級改造車廂、部件等，令「烏蠅頭」可以活出「第二生命」，繼續服務社會。

港鐵指好重視陪伴市民多年嘅「烏蠅頭」車廂，盡量保留佢原貌。至於其餘嘅車卡，港鐵會以3R環保概念（減廢、重用、循環再造）作為原則處理。退役「烏蠅頭」嘅部件，例如座位、扶手都十分適合用嚟活化，直接服務市民，好似吊環扶手，港鐵員工就諗到將佢改裝成上肢體伸展運動器材，等公公婆婆喺屋企或者長者中心都可以活動吓。至於列車座位，港鐵就將佢贈送畀學校，等佢哋成為操場邊嘅座位。而列車車廂，港鐵就打算將佢改裝成戶外同流動課室，令佢哋成為小朋友獨特又有趣嘅學習點。Kelly都佩服港鐵咁有創意同環保！
Kelly Chu