KellyChu - 參展商大讚特首隨和 李家超撐工展會 花2700元掃貨刺激經濟|Executive日記

特首李家超尋日到維園主持一年一度嘅工展會開幕,一場嚟到,自然唔少得買啲嘢。期間佢就花咗二千七百幾蚊,買咗冬菇、腰果、花菇、雞仔餅同手製花等。數一數農曆新年都就快到,Kelly知道特首係出名嘅「愛妻號」,唔知係咪提早幫李太「入定貨」?

開幕禮結束後,特首就去咗海味老字號「安記鮑魚」、零食品牌「自然派」等攤位,買咗冬菇、腰果、花菇、雞仔餅等靚貨,花咗大概二千七百幾元。其實呢啲嘢都好啱過年用,特首出名錫老婆,有人就問佢係咪提早幫李太「入定貨」,佢就笑住話:「今日係支持工展會」。「安記鮑魚」嘅潘老闆之後就透露,特首買嘢嗰陣同攤位同事「有傾有講」,份人好隨和。

特首亦好支持社企發展,喺其中一個社企攤位買咗紮好靚嘅手製花。現場亦有人問特首,係咪買嚟送畀太太,佢就笑咗下冇直接回答。不過特首之後就喺fb專頁話,佢買嘅嗰紮手製花,係一班聽障人士親手整嘅,十分之靚,放喺屋企,或者送畀人都好合適。

另外,特首亦參觀咗今年工展會嘅亮點攤位「懷舊玩具時代」,形容呢啲玩具勾起唔少童年回憶,又話細個嗰陣冇手機、冇網絡,但只要拎住一個細細嘅鐵皮機器人喺手,已經可以高興玩大半日。
Kelly Chu ■唔單止去工展會支持食品,李家超都有同公仔合影!好想要!
■唔單止去工展會支持食品,李家超都有同公仔合影!好想要!
更多文章