KellyChu - 立會議員盧偉國整私房叉燒益同事|Executive日記

立法會昨日開始新年度工作,經民聯主席、立法會議員盧偉國原來唔單止係工程師,仲入得廚房,整得一手絕好嘅「盧家肥燶瘦蜜味叉燒」,而且帶咗去立法會,喺午膳嗰陣幫各位議員加餸。而唔少議員食完之後個個豎起拇指,大讚呢味盧家私房菜好嘢!

盧偉國喺facebook發文話,一個幾月前,為咗慶祝立法會恢復供應星期三大會午飯,特意焗製「盧家肥燶瘦蜜味叉燒」,畀各位議員加餸。但因為屋企廚房細,產量有限,導致私房叉燒供不應求,唔少議員話「遲咗」入飯堂,搞到試唔到佢手藝。所以,佢昨日就特意一早起身,親自炮製十幾斤「肥燶瘦蜜味叉燒」,再幫同事加餸,同時祝願大家「家肥屋潤,甜甜蜜蜜,新年進步,工作順利!」

盧偉國仲唔介意透露秘方,話呢味叉燒用咗本港豬農培殖嘅優質黑毛豬,加上獨家醃製配方,同時烤焗溫度同時間「都積累咗經驗」,「真係幾好味㗎」。
Kelly Chu

hd