KellyChu - 錦田大祠堂勁有詩意 梅花朵朵開超吸引|Executive日記

近月白梅喺元朗錦田水尾村盛放,有拍友就喺一間大祠堂前捕捉到「白梅紅牆」嘅古意,大獲好評,有人仲讚歎:「諗唔到可影到大祠堂咁靚」。錦田水尾村其實好易去,大家呢個周末記得去賞下梅!

有網民喺facebook上載元朗錦田水尾村嘅白梅相,只見喺「清樂鄧公祠」對開,白色嘅梅花映襯祠堂紅牆,別有一番古意。樓主同時好有詩意咁留言:「古寺紅牆點點白,清新淡雅數枝梅」。面對咁有古意嘅美景,唔少網民就讚歎:「拍得超靚。靚在個背景,同啲花互相襯到」、「諗唔到可影到大祠堂咁靚」。樓主就回應話:「去到現場環境梅花已經開始凋謝,取景位置構圖已經想好,位置其實難拿捏,前面人來人往,要等冇人經過快手按快門」。

Kelly查咗下資料,發現「清樂鄧公祠」又名「思成堂」,喺青磚建築,建於明朝中前期,即一四九○年左右,以紀念錦田鄧氏第十七世祖鄧清樂,祠堂正脊上有一對鰲魚裝飾。另外,去水尾村嘅方法其實都好簡單,只要坐港鐵到錦上路站,再轉乘601小巴,到水尾村總站落車就得!
Kelly Chu

hd