KellyChu - 第一城 一鎖再鎖 校巴司機去廁所即被鎖車|Executive日記

沙田第一城度被稱為「鎖車之城」,屋苑鎖車隊效率之高,司機聞風喪膽,網上不時有苦主分享被鎖車經歷。有網民在facebook群組「沙田之友」分享照片,見一校巴車輪被鎖,帖文說:「司機伯伯話,我入學校用廁所啫!」認真陰公!樓主說,司機將校巴停泊在學校門口,如有便意冇理由唔入學校上廁,結果一篤尿可能要畀$320開鎖費。

事件引起關注,有網民留言感歎「一篤尿$320(解鎖費),下次司機要車內攪掂啦!」替司機感不值:「校巴都係服務本屋苑居民,人有三急都要鎖車,做法有啲絕」;不少人紛紛批評鎖車隊「鎖車鎖到走火入魔」;另有網民揶揄「每程校車加價$320」、「預見成人尿片的需求增加」、「希望第一城鎖車隊一視同仁,下次鎖救護車消防車畀個like佢」。所謂法律都不外乎人情,Kelly覺得可通融時就通融下,大家日後好相見嘛!
Kelly Chu
更多文章