KellyChu - 馬拉松星期日開跑 港九多區實施臨時封路|Executive日記

嚟緊嘅星期日,係香港馬拉松舉行嘅大日子,適逢防疫大鬆綁,跑手唔使出示針卡或檢測陰性證明,冇咗「限聚令」,大群人一起出發,諗起都高興。Kelly相信氣氛一定好正!屆時港九多區多條道路將暫時封閉,多條巴士路線及小巴路線都會改道,大家要留意啊!

Kelly話你知,全港多處周六晚11點半起,會分階段實施臨時封路安排,直至周日下午1點15分。警方周六晚將逐步封閉西九龍公路、青朗公路、青馬大橋、彌敦道及附近一帶、東區走廊等等。運輸署預計,大約230條巴士路線及40條專線小巴路線,會暫停服務或者改道。警方亦提醒多個地方包括油尖旺、港島北區等交通,將會顯著擠塞,揸車人士記住要避免前往。

今屆渣馬有3.7萬人報名參加,大會話跑手唔需要再做核酸檢測或快測,但必須喺起點前,以及完成比賽後戴口罩。若跑手確診,應考慮有冇不適,唔好勉強參賽。
Kelly Chu
更多文章