KellyChu - 空中歎煲仔飯、蛋撻、雲吞麵|Executive日記

最近唔少港人外遊,少不得坐飛機食飛機餐,當然一啲都唔可以求其。國泰航空就推出多種風味嘅飛機餐,既有「港式滋味」,亦有節日或養生菜式,而且定期更換,真係上咗飛機都唔愁沒好嘢食!

國泰話,作為以港為家嘅航空公司,一直致力推廣香港飲食文化,所以推出「港式滋味」機上餐膳體驗,等乘客搭飛機都可以食到地道廣東菜,商務艙旅客可以食到「蝦乾海味肉餅煲仔飯」,經濟艙乘客就點到「港式蛋撻」同「瑞士汁雞球飯」。國泰亦同世界著名星級名廚及餐廳合作,定期推出新穎美食,今期就有「麥奀世家雲吞麵」!

國泰又話,喺重要傳統節日,會定期推出節日限定嘅空中餐膳,而家新年初始,食「甜酸松子魚」就最啱,年年有餘啊嘛。同時,唔少人注重健康,國泰於是納入更多健怡養生菜式,例如「烤椰菜花紅石榴藜麥沙律配紅椒忌廉汁」、「香煎羊奶芝士伴意式燴雜菜」,等茹素或彈性素食嘅乘客都可以食得開心。

國泰亦提醒大家,上述菜式而家都可以喺國泰航班食到,餐單會持續更換,所以菜式喺唔同月份或有唔同。
Kelly Chu
更多文章