KellyChu - 國際龍舟邀請賽盛事 時隔4年強勢回歸!|Executive日記

社會復常,再有盛事回歸!旅發局宣佈,與中國香港龍舟總會合辦嘅「香港國際龍舟邀請賽」將於6月24至25日喺維港復辦,係4年嚟首次舉辦賽事。今次會邀請本地、內地、台灣同海外各地嘅龍舟勁旅參加,仲首設1萬美元獎金畀四大賽事(即國際公開金盃賽、國際錦標賽、粵港澳大灣區錦標賽、香港錦標賽)嘅勝出隊伍!Kelly已經mark好日子,到時去睇各國大隻佬扒龍舟!
龍總指,今年活動將接受大概40支非本地同埋120支本地龍舟隊伍報名。如報名隊數超過預期數目,除獲邀隊伍外,將會以抽籤形式決定各賽事入圍名單。而比賽喺維港舉行,意味住市民、旅客到時可以喺尖沙咀東海濱至星光大道一帶欣賞咁多場激烈賽事。

一講起龍舟,首先會諗到嘅地方係沙田城門河啦!沙田體育會會長韋國洪同Kelly講,沙田龍舟隊自80年代,就開始每年參加國際龍舟邀請賽,對於賽事復常,佢十分開心!佢相信4年未有參加龍舟邀請賽嘅沙田隊上下都會「搏命玩」。

除咗四大賽事,其他比賽例如「扮嘢大賽」都十分有睇頭!睇返往年比賽相,見到咁多位參賽者穿上奇裝異服,例如速龍、香蕉、古裝、彩虹裙等,真係好得意。
Kelly Chu
更多文章