香港近月藝文氣息洋溢，旅發局青年學院就同城市大學創意媒體學院合作，即日起舉辦「香港‧大城小區」數碼藝術展，展出學生創作嘅數碼藝術作品，展現西九龍、深水埗同中環嘅地道社區風貌，其中有作品仲喺法國獲獎，文藝嘅你又點可以錯過！
展覽即日起至4月23日喺中環PMQ舉行，展出53位大學生創作嘅32份數碼藝術作品，分別以西九龍、深水埗同中環為題，用影像同音樂，創作出1至3分鐘片段及3D短片，透過藝術、科技同光影製造空間感，等觀眾用嶄新立體嘅方式，體驗香港地道社區風貌。其中以深水埗為主題嘅影片作品《OoOo》，用彩色小球穿插出現嘅形式，意指深水埗販售嘅珠仔，喺法國動畫展獲3D影片大獎，將香港獨特藝文風貌，推廣到國際舞台，小妹覺得真係過眼難忘，大家記得留意！
展覽仲一連三周末特設免費手工藝工作坊，等大家製作特色紙燈籠、個性化布袋同明信片之餘，仲可以體驗傳統工藝，加深對地道文化嘅認識！
旅發局總幹事程鼎一就話，旅發局致力用體驗同創作活動等唔同形式，鼓勵年輕人發揮想像力，以全新方式呈現社區日常同獨特文化，為旅遊業注入新動力，向全球宣揚香港獨有嘅藝文魅力。
Kelly Chu
;){kind=link}
;){kind=link}
;){kind=link}
;){kind=link}
;){kind=link}
;){kind=link}