KellyChu - 8成門票公開售 久石讓音樂會抽籤實名制打擊黃牛|Executive日記

香港樂迷真係好有福氣!相隔5年,日本音樂大師久石讓6月會再次來港舉辦3場音樂會,今次會同香港管弦樂團聯手首演「第二交響曲」等3首作品。而為咗打擊黃牛,大會本月22日會以「抽籤實名制」公開發售8成門票,各位樂迷記得搶飛喇!
上次門票10分鐘售罄

3場音樂會6月22至24日晚上8點會喺香港文化中心音樂廳舉行,屆時會演奏3首久石讓作曲嘅管弦樂作品,包括帶觀眾走入自我發現旅程嘅第二交響曲、樂曲《Woman》、仲有宮崎駿動畫《幽靈公主》中嘅配樂交響組曲。同時,香港著名女高音鄺勵齡會喺《幽靈公主》組曲部份擔任獨唱。3首作品都係香港首演,小妹聽下都覺得興奮!

久石讓對上一次來港演出,已經係2018年,當時門票10分鐘售罄,之後畀黃牛狂炒到過萬1張,於是大會宣佈加場,仲首度引入「抽籤實名制」。今次港樂亦會延用「抽籤實名制」公開發售約8成門票,分為1980元、1480元、680元3種,每個登記人最多可買2張,其餘就分配畀贊助商同合作夥伴。

大家5月22日上午10點起,可以到城市售票網抽籤,結果會喺5月29日上午10點公佈,屆時每張門票都印有觀眾英文名,唔可以轉讓,入場嗰陣要出示附相片嘅身份證明文件。
Kelly Chu ■久石讓將再與港女高音鄺勵齡(左)同台演出。
■久石讓將再與港女高音鄺勵齡(左)同台演出。
更多文章