KellyChu - 李家超送花 冧生命中最重要兩「媽媽」|Executive日記

昨日係母親節,特首李家超(圖)就祝願天下媽媽都節日快樂,而出名係「愛妻號」嘅佢,除咗送花畀媽媽之外,當然唔少得送多束畀太太,仲講明佢哋都係自己「生命中最重要嘅兩位『媽媽』」。同時,多位政府官員喺社交媒體發文,祝願各位母親節日快樂!

李家超喺Facebook發文話,趁住母親節準備咗兩束花,送畀「我生命中最重要嘅兩位『媽媽』」,之後特登標註返呢兩位媽媽,分別係指母親同太太。小妹就相信,無論特首嘅媽媽定太太,收到花都一定好sweet!

同時,保安局局長鄧炳強、民政及青年事務局局長麥美娟、公務員事務局局長楊何蓓茵等政府官員,亦都喺Facebook發文祝賀天下母親節日快樂。

其中同屬「愛妻號」嘅鄧炳強,早上就同太太、女兒一家3口歎早茶,場面溫馨。而昨日雖然落雨,鄧炳強都專登冒雨買咗蛋糕送畀佢嘅夫人,形容「平日都係妳照顧成頭家,今日就等我照顧返妳」。
Kelly Chu
更多文章