KellyChu - 南韓「廚神」明星推介香港靚景美食|Executive日記

為咗吸引全球旅客,旅發局最近請咗南韓人氣親子電視節目《超人回來了》,仲有YouTube平台有超過500萬粉絲嘅「韓國廚神」白種元,到香港一邊拍攝節目、一邊推介香港嘅地道靚景美食,大受歡迎,唔少韓國觀眾都話要嚟香港搵返同樣嘅味道!

旅發局今年初邀請咗《超人回來了》團隊來港拍攝,節目中人氣家庭、韓國著名足球員朴柱昊帶住朴娜恩、朴建厚同朴振瑀3名混血子女,接受各種有趣任務,期間試過喺地道茶檔品嚐港式美食,又到九龍公園觀鳥、同詠春師傅學耍功夫;之後亦去咗迪士尼樂園遊玩,仲特別到中環海濱搭摩天輪,喺高空睇住維港大讚「香港夜景真係好正」。
白種元大讚港味道

局方亦請到白種元到香港開展美食之旅,期間佢試過一堆香港地膽推介嘅地道美食,例如大帽山懷舊茶樓嘅傳統點心、秘製車仔麵、傳統中式糖水、風味大排檔小炒等,好食到連「韓國廚神」都忍唔住大讚「嚐到了天堂嘅味道」!而介紹各式美食嘅同時,白種元仲將香港嘅風土文化講畀韓國觀眾聽,大受歡迎,平均每集影片有過百萬觀看次數!
Kelly Chu ■南韓人氣親子電視節目《超人回來了》團隊來港拍攝。
■南韓人氣親子電視節目《超人回來了》團隊來港拍攝。
更多文章