藝人盧頌之(DaDa)的老公，前香港籃球運動員及演員趙勁皓(King)，投資飲食生意已有6年時間，30歲的他擁有4間食肆、兩間健身室，生意愈做愈掂，盈利愈來愈多。好有生意頭腦的King最近染指創科生意，投資近7位數成立Eco-genius公司大搞創意科技，集環保智能、手機遊戲和應用程式於一身。由於係行外人，要靠專才，他坦承唔會太考慮回本問題：「預咗輸都唔重要，但我唔排除將來研製嘅產品會一鳴驚人，總之唔試過就一定輸！」
趙勁皓承認創意科技非專長，但想接觸，因為智能家居、環保產品，高科技games及apps是未來趨勢，唔想落後同時，睇吓係咪有商機。King原意做一間環保公司，為保護地球設計環保工具專幫公司慳冷氣錢，及後生意愈搞愈大，發展到搵埋其他公司合併開發games、apps、應用於廣告牌、展覽以及演唱會的全息投影技術，令虛擬與現實帶出視覺效果。他邊學邊睇住公司拍檔做，因為大家崗位不同，他主力搵對咀形的合作夥伴拍住上，共享每項創科成果。King認真道：「其實有好多初創企業有好多人才，擁有豐富嘅創新意念及產品，但就只欠機會同埋人脈，而且資金有限，我會幫手搵投資者一齊玩，希望可以做到伯樂推動科研人才。」
因為科研唔係他掌握之內的實業，他坦言沒有想到賺錢問題：「做餐廳、酒吧都好，我對錢渴求不大，希望在既定程序進行，將來開發到一個可以代表到香港嘅遊戲，最重要係品質。」趙勁皓屬王祖藍公司藝人，問他可會搵王老闆支持？他即耍手擰頭：「唔會啦，雖然祖藍好錫我，會爭取好角色畀我做，而且佢喺內地有強大資源同網絡，但一切言之尚早，等科研產品推出先啦，我唔想輸咗身邊人嘅錢，更加唔使剛起步就要人幫手，希望成功到某地步可以同祖藍合作，咁樣先算係一個好關係。」
採訪：方騫平
;){kind=link}
;){kind=link}
;){kind=link}
;){kind=link}
;){kind=link}
;){kind=link}