林月庭 - 街坊Omakase|甘美人生

朋友約在大角嘴街坊名店「良順興」歎美食,由老闆娘Candy發辦,即係近似日食肆潮興的Omakase(「阿媽家姐」),但不是隨便玩,大廚Ken特別炮製了龍蝦二食。

頭盤泰式凍鮑魚,微酸輕辣,鮑魚鮮味大提升。二款送酒小食,椒鹽鮮魷,炸皮比薯片更輕脆,炸鹽焗雞翼係新出品,人人讚好,但味蕾奄尖的大編輯建議,下次調製自家海苔味鹽或麻辣粉,給客人玩shake shake,更好玩。

魚湯豆腐沙白和雙酸菜鱸魚,前者純和鮮甜,後者開胃醒神,已經俘虜無數食客的心,日日熱賣,如果米芝蓮神秘食客試過,一定獎賞星星!

今次「阿媽家姐」主角是龍蝦,大廚Ken自家秘製的XO醬,遠近馳名,用來炒西芹帶子龍蝦,非常「和味」,還用龍蝦加鮮蝦熬湯,加入脆米煮湯飯,人人連吞兩碗,跟住竪起大拇指。KOL美男太高興,對大廚Ken講,下次想食紅衫魚起肉煎香,加鮮茄蛋汁,Ken即點頭示意「OK」。大家快啲約下一次「阿媽家姐」啦。
林月庭
更多文章