講是非——真混血超美味

  十多廿年前流行世界性Fusion食制。再早一點,香港「豉油西餐」何嘗不Fusion?

  「豉油西餐」源於廣州,不少人不以為然!事實廣州為中國近代最早與外國通商發祥之地;十三行、沙面即為清朝開放予外商通貿並建領事館之處,太平沙出現中國首家Fusion「豉油西餐」太平館,時為1860年,港島割讓予英國,上海變租界才不過幾年貨色!

  打正旗號在香港煮賣Fusion為澳洲人Michelle Garnaut,其位於FCC樓上的Michelle’s(肥彭至愛之一,筆者往昔其一飯堂,可惜已撤離香港,自從在外灘建立上海首家正式西餐廳後風山水起,M’s早成外灘一度人物Fusion風景),是司徒衛鏞William Szeto出版新書《回憶的味道》引發筆者不斷從混血角度思考不單止食物,還有各式人物事?

  西九新發展文化區FAM囍公館得嚐出身Fusion;江浙原籍、重慶出生、香港成長並習廚藝⋯⋯龍師傅,泡製順德魚湯作底,煮正宗川味水煮魚,讚歎未完,單尾:大閘蟹粉煲仔飯。好食到呆!龍師傅混血廚藝貫通中國各省,自此聞香下馬,進入西九路途幾複雜都好,心思思囍公館。

  日前蔣芸大姐宴客,China Tang(置地廣場唐人館)有型到痹達廚Menex準備了Fusion煲仔飯,美味到暈幾暈!為食心痕,十數天後老友記回倫敦之前,提議幫襯唐人館,定要嚐過Menex廚藝才好返英,單尾;大廚現身桌前真身處理白松露蟹粉煲仔飯,將南歐名物如雪片散落在金黃江浙極品,未完⋯⋯廣東至簡約、至深層、至膾炙人口之精華「煲仔飯」墊底,嘩⋯⋯Menex你條死仔害人不淺,搞到日思夜念!

鄧達智


hd