• 2022年1月27日 星期四
  • 20º
  • 86%
  • facebook
  • Weibo
  • RSS

講是非|花膠鮑魚萬能煲

入隔離營前隨身物件清單:底衫褲、更換衣物、即溶咖啡茶、好立克、鹹蛋腐乳XO醬、花生醬、杯麵、即食粥、白芝麻梳打餅、水果、小型號電水煲、電飯煲。唔嫌重:萬能煲(可煲湯炆鮑魚)、花膠鮑魚海參乾瑤柱冬菇蠔豉⋯…以上廣東人及港人隨身帶備之移民、探親、着草、旅行、走難、入營、入院⋯⋯必備之寶;親身體驗得出的結論,唔信?

咪玩啦!食為先,港人一貫作風信念,點會唔信?風水佬呃你十年八年,老實話你知,入院入營,一入便知龍與鳳,在下曾COVID兼被報道過,兩年前第三波時與我有密切接觸諸人曾被隔離,我們經驗千真萬確!

議員火都嚟埋鬧拆天:一)執好行李,等候專車送往竹篙灣,一等等到天黑!

智經歷:早上檢測,晚上報告結果陽性。防疫中心人員即來電跟進:留家、房中,避免與人接觸包括家人或家傭;親友送湯水、中藥等放在門外石橋,由印尼姐姐送上樓房門外窗台,待她下樓後才攝手攝腳自己搬回,每天幾餐如此。

兩天後印尼姐姐送入隔離營,空蕩蕩房子一人獨處,遊走樓上樓下於百頁窗緊密封閉,上天台呼吸新鮮空氣也等深夜萬籟俱寂,無謂讓鄰居看到嚇餐死;那上下,迷信的愚民當確診者如發麻瘋,不碰觸,望下都死!

第三波疫情緊張,缺病牀,一等四天才派送聯合醫院。

議員火都嚟埋鬧到拆天:二)等入營已屆午夜,早知係咁,司機揸私家車送入營咪得?營內衞生情況一般,花灑水壓低,飯餐難食⋯⋯陳肇始同林鄭應親身試吓入營經驗!

智經歷:等了四天,歡天喜地等到聯合醫院牀位,執拾好細軟包括:小水煲、杯麵、院內穿過即棄的略舊衣物。被通知那天黃昏起,白車隨時來,一等到午夜,冇辦法,有關人員與車輛在風高浪尖疲於奔命,蟻民要體諒,尊貴議員及高官要更包容體諒;如連他們都不能接受,想想萬千巿民呢?

如人人由司機開名車接送入院、入營,首先有機會播毒;其次,下下顯露高官、議員高人一等,誰說不是陷特區政府不義?

你估入營係去Rosewood酒店Staycation咩?咁講,食家朋友無奈入營隔離,帶備萬能煲鮑參翅肚,天天煲勁湯,攤在牀上煲韓劇,事到如今化悲憤為食力,既來之則安之,鬼叫你哋去P咩!
鄧達智

hd