鄧達智 - 升呢版良順興|講是非

酸菜魚、水煮安格斯牛肉麻辣早已殺入本港食肆,不出奇;桌上同時有泰式香茅冰鎮鮑魚、豬皮炒豬大腸、椒鹽魷魚、鹽焗重皮蟹、水蟹粥⋯⋯當然不可不提鎮店名菜好食到聞香下馬,以鹹蛋黃、炸瑤柱、芝麻炮製「鍾無艷肉餅」;在下提議加塊水牛芝士做肉餅Burger,大編輯舉腳贊成命名:大佬肉餅漢堡。

後生Ken哥廚藝高超,觀其店子空間有限,日日夜夜做到上氣唔接下氣,提議不如日頭只做撚手名菜套餐或外賣肉餅飯、麵、粉、包;留精力專攻夜晚價錢略加包場或私房菜,提升利潤與形象,絕地升呢!

大編輯盛讚大角嘴「良順興」多時,一再邀約前往大快朵頤,地方骨子,貼地窩心美食一碟接一碟。小欣姐在專欄大讚,立馬成為為食鬼們Next Best Friend;筆者一直讚賞老闆/大廚Ken哥靚仔程度遠遠拋離「荃灣豬肉仔」、大馬「燒臘張國榮」及不少型男、鮮肉廚神,不出所料,小欣姐推波助瀾,老闆娘Candy心驚肉跳在社交平台鋪文:粉絲就不為美食,也為美男波濤洶湧湧過來!

過去數星期,提供小小錦囊,跟老闆娘默默WhatsApp研究如何將「隱世小店」升呢;從枱布挑選到菜式命名,本想親自到深水埗探索隱世花稿圖案作枱布,誰料Candy急不及待,找來供貨單位提供不同枱布挑選,可見「良順興」雖為小店,話事人坐言起行絕不馬虎!

幾次為食前來大角嘴博學里「富多來商場」一期六十號,絕非筆者熟悉及慣常出行地區;飲食跟時尚大不同,扮靚買衫講究位置啱唔啱;亦也滿足虛榮心其一包裝,去Landmark買、定係過斜對面環球商場,同一件衫,命運天淵之別;唔好話買,唔係Landmark而係環球?對某啲人說來:真係送都唔要!

民以食為天;為食十八區走遍,為食鬼唔介意搵食入新界,去離島等等山旮旯,何況九龍區新心臟地帶奧運站?背後博學里一帶,唔話你唔知,嗰個社區近年靜雞雞湧現小酒吧、串燒店、居酒屋等等,然而新Yuppie(係咪好耐冇聽過呢個名呢?)跟舊街坊共享睇嚟完全冇衝突,只欠東風,立即起朵!

元朗交通廣場面對未出現YOHO之前嘅「雞地」,簡直邊沿地帶,冬菇亭大牌檔猶自可,入商場開乜舖都難;近二十年前出現中環金鐘尖嘴素質、元朗價西餐廳「New York Cafe」,最初同樣死死地氣,終被發現,幾篇文章報道;即成一晚三輪長龍店,也帶旺了該商場與周邊商舖。好吃無倫「良順興」的時刻到了,升呢肯定,連博學里一圈定必吸引招徠非本區客!
鄧達智
更多文章