任睇No.1
  • 29º
  • 81%
  • 2022年10月3日 星期一

徐燦傑 - 李克勤的後黃金時代|投管俊「傑」

隨着中港兩地嘅融合,音樂世界亦都走向呢個方向,無他的,市場不斷擴大,順勢而為都係好多音樂人發展嘅方向!中國市場,無疑將香港歌手李克勤提升到另外一個地位,甚至比佢以前嘅年代活得更加精采!更加得到大家嘅喜愛!

你睇克勤咁多年,都係從一而終,繼續堅持佢自己嘅音樂!其實克勤出現喺一個對相對唔公平嘅年代!九十年代四大天王嘅出現確係將克勤嘅角色「邊緣化」!如果我係佢,當然會唔開心,但係因為係呢刻嘅改變,反而令到佢更加知道自己嘅最大嘅賣點,都係佢嘅靈活性同埋佢紮實嘅唱功!你又唔好理,喺過去呢段日子裏邊,無論「左倫右李」或者「克不容緩」,甚至係參加內地嘅挑戰比賽,都為克勤喺音樂旅程上創造咗好多好多嘅紀錄,好多好多大家美好嘅回憶!環顧樂壇,克勤就好似一個百變嘅Lego,為唔同嘅歌手創造更亮麗嘅夢幻舞台嘅同時,製造咗一個真真正正屬於自己嘅元宇宙!

克勤絕對明白「1+1」等於3嘅道理,佢利用時間透過自己嘅「單飛」,去再次證明無論音樂世界點樣改變,佢都能夠繼續喺呢個樂壇,為大家「唱到老、學到老」!睇過佢好多唔同嘅演唱會,佢絕對係其中一個橫跨「多年代、同時擁有數之不盡金曲嘅歌手之一!」

如果大家欣賞佢係因為佢零瑕疵,呢個絕對冇問題,但係大家要更加欣賞嘅就係佢對音樂從一而終嘅心情!尤其喺內地唱歌堅持唱廣東歌,呢份嘅心情,亦都係能夠令香港樂壇再一次發光發熱嘅基礎!希望有機會將來同克勤做一個更加深入嘅訪問,分享更加多唔同嘅感覺!如果你問我克勤係隻乜嘢股,佢肯定係隻「無敵百搭股」!繼續努力!我們永遠不倒的穿梭機!
註冊合規師公會投融資部總召集人
徐燦傑

hd