專欄

洪禮賢 - 長途谷賽季尾利冷｜Chok王心得

Chok王心得 - 洪禮賢 2022-06-06 列印

周三晚九場谷草夜賽用A跑道作賽，由於連續幾日都會有雨，屆時九成九打水戰，但好難估計場地模式，皆因落住雨跑馬，雨水或時有時無，對跑道有着不同程度的影響。所以，臨場執生都唔一定有用，遇上這環境，必須戒急用忍，減注、忍手方為上策。

今期賽事較多中長途場合，分別有兩場一哩、兩場千八米和一場二千二百米，另有四場千二米，中長途賽好唔好玩？見仁見智。就以今季谷草千八米為例，季內跑過二十七場（其中一場雙冠軍），大熱門成績為十一冠一亞三季十二負，表現蠻不錯。不過，近來此程頻頻吹冷風，四月打後跑過五場谷草千八米，僅得「金剛福星」一駒是以熱門身份勝出，餘下的「快益善」、「天池怪俠」、「電訊犇豹」與「有力」，統統都是冷W，勝出賠率介乎十七至廿六倍。由此可見，表面上，本季谷草千八米是大熱門一展所長的舞台，但時近季尾情況逆轉了，冷馬反而大行其道。
洪禮賢