任睇No.1
  • 30º
  • 66%
  • 2022年7月6日 星期三

乜都5G——啞子食黃連

  上星期喺太古坊碰到業界老行尊大工程師P,見佢愁眉深鎖,一問之下,原來有客戶投訴將軍澳日出康城的流動通訊接收好差。大工程師P對自己一向要求好高,聽到這些意見梗係心有戚戚焉。

  據我所知,日出康城由50幾幢大廈組成,有超過25000個單位。這個社區需要幾個無線基站先至可以提供足夠的網絡覆蓋及容量。數數吓應該有好幾年喇,業界同屋苑都未能達成任何加建基站的協議。

  大工程師P說:「我們和其他行家絞盡腦汁,已經在屋苑以南的工業村,以及周邊樓宇起咗發射站,希望改善訊號接收及提升網絡容量,但效果始終不及在屋苑內加建。我哋啞子食黃連,有苦自己知。」

  「我們幾間電訊商多次去信屋苑,要求加建基站,但咁耐都無正面回應。」大工程師P搖晒頭。

  我記得幾年前5G投頻,業界已經提出現時的電訊商同公用事業無乜分別,應該有水電煤公司的同等待遇,即係有法定權力進入樓宇、商場、港鐵範圍及行車隧道等安裝電訊設備,為機不離手的用戶提供隨時隨地的服務。

  大家都知道電訊頻譜是各位都有份的寶貴資源,所以每次投頻,電訊商都希望價值數以億元計的頻譜能發揮最大效益。縱觀全球,香港的流動通訊服務性價比實在超高,滲透率高達275%,好多家庭都以手提電話代替固網電話,大家對流動通訊服務都有很高要求,而電訊商亦扭盡六壬,傾盡全力,為用戶提供最好的服務。

屋苑加建基站需多方協調

  業界一直有聲音提議由政府牽頭與不同持份者磋商,希望能讓電訊商在政府物業、街道設施及新公共發展項目場地舖建基站。一兩年前,在政府的加持下,業界便成功爭取逾千個可擺放通訊器材的地點,方便電訊商部署5G網絡。

  事實上,只要不同的政府部門、屋苑,以及電訊商,能多加溝通和互相協調,大家都以公眾利益為大前提的話,要提供盡善盡美的覆蓋,做到滴水不漏,真係指日可待!

  我同大工程師P趁三點三下午茶時間放空一下,畢竟業界的問題,需要大家一齊努力解決,毋須食黃連日日皺眉頭。

和記電訊香港行政總裁

古星輝


hd