任睇No.1
  • 33º
  • 69%
  • 2022年8月15日 星期一

乜都5G——ESG從5G做起

  流動網絡基建嘅耗電量龐大,以我哋為例,就佔咗公司總耗電量九成!所以喺節能工作上,優化流動網絡基建係一般電訊商嘅首要目標之一。
  比起4G,5G技術超低時延,又快成10至20倍,有研究指5G嘅耗電量比4G高70%。加埋新起嘅基站,令用電量捷捷上升。所以好多行家一直以嚟都積極透過唔同嘅節能方案,提升網絡質素之餘,同時提升能源效益。等我同大家分享兩個喺5G新世代,應對減少碳排放好重要嘅節能方案。
優化機樓提高效益
  首先係同機樓有關嘅。幾年前,我哋已經開始整合同優化機樓去提高效益。到目前為止,我哋減少咗超過40000平方呎嘅佔地面積,從而減低相關耗電量。另外,喺全新同埋已經裝修咗嘅機樓入面,採用「面對面」或者「背對背」嘅排列方式擺放機櫃,令排出嘅熱空氣向上升,再由天花回流去空調系統。呢種方法有效分隔熱空氣同冷空氣,直接提高空調系統嘅製冷效果,有效提升能源效益。
  第二就係關於基站安裝。講開散熱,我哋大部份基站都採用傳統設計,即安裝喺一啲纖維屋或者不鏽鋼箱內;為咗幫助器材降溫,日日都要開冷氣,即係好似夏天咁,但電訊器材熱好多,所以以往要用好多電。不過,隨着科技進步,新嘅基站設計已變成全天候型,即係唔怕日曬雨淋,只要放喺一啲通風嘅地方,就唔使再裝冷氣,可以用少好多電,大大減少碳排放。
  流動通訊已經踏進5G新世代,我哋而家採納嘅ESG工作項目,相信喺可見嘅未來,將發揮舉足輕重嘅作用。
和記電訊香港行政總裁
古星輝

hd