任睇No.1
  • 32º
  • 70%
  • 2022年8月15日 星期一

乜都5G|再停面授課 EdTech刻不容緩 - 古星輝

最近一個星期,學生們暫停面授課堂,重啟網上學習。喺呢兩年嘅疫情期間,教師同學生都已經適應呢一種上課模式,近期甚至已經出現EdTech(Education Technology或教育科技)呢個名詞。

喺內地,網上學習嘅市場需求一直上升,更衍生咗好多元化嘅智慧教學產品,例如電子字典筆、機械人及教學專用平板電腦等,呢啲產品結合人工智能(Artificial Intelligence)之後,帶嚟全新學習模式。內地多鯨資本教育研究院預測,智慧教學產品市場規模喺未來兩年將會達到570億元人民幣。

另一市場研究機構IDC預期,教育界未來嘅重點開支會放喺數碼轉型身上,將課室體驗數碼化,所以佢哋喺物聯網方面嘅開支將會有12%嘅增幅,係其中一個升幅最高嘅行業。
未來網課料應用VR及AR

目前我哋所見嘅網課,大多係對住平板電腦,打開視像會議應用程式。可以預計,未來虛擬實境(Virtual Reality)及擴增實境(Augmented Reality)應用,將會令網上學習帶嚟更多唔同嘅學習場景,再唔係紙上談兵咁單調,再諗遠啲,未來學校可以喺元宇宙開個課室,老師學生齊齊喺元宇宙上堂。

5G技術嘅超高速、極低時延,直接催化EdTech嘅迅速發展,以上所講嘅智慧教學產品、學校數碼轉型、未來虛擬實境及擴增實境等,全部對網絡有極高要求,所以冇5G根本唔成事。

舉多個貼身啲嘅例子,大家喺屋企要上網課,要清、要順,又要有互動,對家居寬頻點都要有啲要求,5G寬頻速度高、安裝簡單同擺放靈活嘅優勢正合需要,小朋友喺屋企任何位置上網課都唔怕連線唔靚,又如果家中兩個小朋友同時要上網課,大可以一人一個私家5G寬頻,唔使再怕爭線用。

所以話,教育點會唔關5G事呢?
和記電訊香港行政總裁
古星輝

hd