任睇No.1
  • 32º
  • 70%
  • 2022年8月15日 星期一

乜都5G|「5G消息」新藍海 - 古星輝

智能手機普及前,每逢節日大家都會傳短訊祝福親友。不過隨著各款即時通訊應用出現,短訊好似變咗做接收驗證碼嘅工具。到咗5G年代,短訊應用有機會再發揚光大。

內地電訊商喺農曆年前推出咗一項叫「5G消息」嘅服務,呢項服務其實係SMS同MMS嘅延伸。有人稱「5G消息」做Message over 5G,佢正正屬於訊息即服務(MaaS/Message as a Service),係結合5G、AI人工智能及雲端技術嘅一項服務。佢嘅最大特色係毋須再額外裝App,亦唔需要登記,喺智能手機嘅訊息介面直接使用,將一切簡單化。
毋須裝App直接使用

內容除咗支援文字同圖片,佢仲可以傳送影片、位置、甚至付款,服務嘅背後可連接至雲端、AI、大數據以至區塊鏈等技術,配合5G速度高、時延低嘅特點,直接提升互動速度,令「5G消息」應用範疇可以延伸到B2C方面。例如用戶透過「5G消息」傳送文字或語音訊息到鐵路票務部,加上點選關鍵字及付款,就可以預訂車票,毋須透過其他網頁或app,喺訊息服務就辦得到。

正在舉行嘅「北京冬季奧運會」,中央電視台就透過「5G消息」帳號,提供賽程查詢、獎牌榜及冬奧指南等資訊,而且仲會將冬奧消息推送到用戶手機,可以話係向內地用戶展示服務嘅好機會。

現時內地嘅收費方面相當簡單,對普羅用戶嚟講,同傳統短訊差不多,免費接收訊息,發送至朋友嘅話就同短訊收費一樣,發送訊息到企業帳號則毋須收費;網絡商就會按照企業客戶嘅訊息類型向企業收費。

內地業內人士預計,「5G消息」喺企業市場嘅前景潛力無限,更有機構指出,到2030年內地「5G消息」嘅市場規模將會達至1000億元,係2019年全國短訊收入嘅約2.6倍。根據GSMA嘅計劃,佢哋已制定好相關標準,預期未來推出嘅5G裝置都會支援「5G消息」。

唔使好耐,手機嘅「短訊」功能可能藉「5G消息」蛻變成功,喺B2C市場開拓一片藍海。
和記電訊香港行政總裁
古星輝

hd