任睇No.1
  • 28º
  • 82%
  • 2022年10月2日 星期日

乜都5G|5G在冬奧 - 古星輝

上星期提過中央電視台透過「5G消息」帳號提供「北京冬季奧運會」相關資訊。原來中國喺今屆嘅冬奧運用5G技術,喺北京市同河北省張家口市兩地三賽區嘅87個場館,以及連接場館嘅通道鋪設全覆蓋嘅5G網絡,再結合4K/8K直播、雲計算、物聯網、區塊鏈及IPv6+技術,為5G喺體育方面嘅應用做咗一次大規模嘅示範。

5G 8K直播:5G 4K直播喺香港做過唔少次,今次冬奧首次用5G+8K技術嚟做開幕儀式直播,將5G直播提升到另一層次。喺8K畫面下,特寫鏡頭入面運動員嘅髮絲都清晰可見。有關嘅內容會透過雲端向全球發放,唔使再用衛星直播車同現場拉專線。配合埋5G及雲計算,全球傳媒只要去雲端就即刻可以接收直播訊號,各地傳媒就可以即時製作精采嘅內容。

「子彈時間」再現:睇過《Matrix》都會留意到奇哥避子彈嘅經典場面。估唔到「子彈時間」會喺冬奧賽場再現,俾觀眾捕捉、重播運動員嘅精采瞬間。製作「子彈時間」要用上幾十部攝錄機,對住主體以360度全景拍攝,再透過5G網絡超高速極低時延嘅優勢,觀眾可以即時自由視角重溫精采時刻。

遙距管理場地轉換:冬奧女子冰球決賽嘅場地,原身係2008奧運嘅籃球場地,只係花六個鐘頭就將場地變身。背後其實係有賴一套結合5G+AI嘅可視化綜合指揮平台,控制場館溫度、燈光同能源消耗,呢個平台同時有助遙距即時場地管理,令場館營運人員數量減少三成,整體效率提升四成。

1.3萬部5G對講機同時通話:由於冬奧喺兩地三賽區同時進行,工作人員嘅溝通係一大挑戰,有網絡商透過5G網絡建構指揮系統。呢個5G系統可以提供超過13000部對講機服務,打破通訊障礙。

5G急救指揮:喺海拔二千幾米嘅國家高山滑雪中心舉行嘅男子全能滑降比賽入面,瑞士選手跌倒喺賽道,透過5G急救指揮平台,喺短短12分鐘內,帶住各式醫療設備嘅5G急救車已經抵達現場,成功把握治理嘅黃金時間。

呢次冬奧實現嘅5G應用令人大開眼界,嚟緊香港會喺2025年全運會嘅其中一個主辦城市,期望到時我哋會有更多創新嘅應用可以藉呢次機會展示香港5G嘅先進發展。
和記電訊香港行政總裁
古星輝

hd