任睇No.1
  • 28º
  • 83%
  • 2022年10月2日 星期日

古星輝 - 5G元宇宙「密」密用|乜都5G

元宇宙年代,萬物革新,連貨幣都要改朝換代,以前畀錢一定要用現金,後來人人都用信用卡同流動支付,踏入元宇宙世界,消費要靠加密貨幣。在此之前,原來愈來愈多企業開始計劃接受加密貨幣付款,最新發展係可以用加密貨幣交電話費,慢慢融入日常生活。

可能你會話,「加密貨幣同5G有乜關係?」我成日話5G係由A、B、C、D、E組成,加密貨幣就係屬於區塊鏈,亦即係B(Blockchain)嘅其中一項技術,o依家嘅NFT或者未來嘅元宇宙,都要靠加密貨幣做交易。
巨企紛接受加密幣付款

金融科技界嘅支付服務商FIS上年9月就虛擬貨幣進行咗一項調查,發現當中35%受訪港人,預計喺未來五年內使用虛擬貨幣或中央銀行數碼貨幣作為支付工具,睇到唔少港人都願意去試新嘢,亦都可能覺得用虛擬貨幣好有型!

其實o依家已經有唔少大企業接納或者計劃容許客戶用加密貨幣付款,例如PayPal同AMC娛樂早前已經宣佈接受以加密貨幣做支付方式,兩大發卡組織VISA同MasterCard都相繼推出加密貨幣相關嘅信用卡,就連即時通訊工具WhatsApp同Signal都開始加入加密貨幣過數功能。

喺計劃推出加密貨幣支付嘅過程中,需要面對各種挑戰同難關,例如要考慮加密貨幣嘅價格有機會非常波動,因為佢完全取決於市場嘅共識,又例如加密貨幣用咗區塊鏈技術,所以匿名程度極高,亦毋須透過政府或者機構嘅監管,可能連記錄都無辦法追蹤,容易出現詐騙事件同不法交易,而且加密貨幣交易嘅程序都比較複雜,手續費亦相對昂貴。

事實上,5G超高速同極低時延嘅特質,可以令加密貨幣付款嘅交易更流暢,同時亦希望加密貨幣潮流推動5G普及化,所以話玩得加密貨幣,一定要用埋5G先至係完整體驗。

雖然好多問題仍然有待解決,但係我相信每項新科技都需要過渡同適應期,我哋需要更加大膽同創新嘅思維,先可以喺競爭激烈嘅市場中突圍而出。
和記電訊香港行政總裁
古星輝

hd