任睇No.1
  • 32º
  • 67%
  • 2022年8月15日 星期一

古星輝 - 5G智能抗疫機械人|乜都5G

5G網絡蘊藏無限可能,除咗可以喺疫情期間幫助大家同外界保持聯繫,仲可以紓緩店舖人手不足嘅情況。最近大家喺超市掃貨,可能都曾經同5G智能抗疫機械人有過一面之緣。

最新嘅5G智能抗疫機械人嘅足跡遍及港九新界,佢哋嘅主要工作包括以5G自動導航,巡邏同支援超市消毒,協助打造安全方便嘅購物環境,保障大家嘅健康。消完毒佢仲可以為客戶推介最hit產品,亦可以提供仿真人對答功能,帶埋路都仲得,可謂多才多藝!
具自動避障功能

5G智能抗疫機械人身上配有10.1吋嘅輕觸式屏幕,能夠獨立連接至電訊商嘅5G網絡,方便店長遙距輸入指令,毋須倚賴公共WiFi或店內其他網絡,既唔怕機械人嘅運作受干擾,亦唔會因為同零售系統共用網絡而影響系統資料嘅安全。呢啲機械人仲設有自動避障功能,令客戶購物更安心自在,同時減低店舖員工受感染嘅機會。喺疫情期間,唔少行業都面對人手不足嘅情況,有咗5G機械人代勞,商戶可以更有效安排人力資源。

其實巿場對機械人嘅應用都有所認識,特別係有咗5G網絡後,因為速度快、時延低,機械人嘅應用層面更闊更廣。相信今次疫情更加係5G機械人普及同一展所長嘅契機。有報告預期,環球機械人巿場嘅價值會由2020年嘅61億美元,上升至2025年嘅230億美元,由此可見機械人巿場嘅潛力龐大,不容忽視!

今時今日,機械人方案已經唔係大公司、大商場嘅專利,筆者喺茶餐廳都見過有機械人送餐。目前,有本地電訊商已能夠為中小企極速設計簡便嘅機械人方案,方便商戶喺疫情期間運籌帷幄。巿場上亦有多元化嘅機械人方案,適用於中小企及不同行業,幫助客戶保持營運效率。機械人方案嘅收費模式好有彈性,既有月費租用計劃,又有獨立銷售兩種模式。由客戶確認定單至安排機械人落舖開工,只需短短一個星期就搞掂晒!相信大家好快就會喺社區見到更多5G機械人同我哋一齊抗疫!
和記電訊香港行政總裁
古星輝

hd