古星輝 - 電訊界全力支援方艙抗疫|乜都5G

第五波疫情爆發兩個幾月,每日確診人數依然達五位數字,呢段期間各界支援市民不遺餘力,總之要齊心抗疫。其實電訊界由一月起已經喺度密密做,務求要以最可靠嘅服務陪實大家,即使足不出戶或者隔離期間,都仍然有高速流暢嘅網絡係隔離撐住大家。

記得喺第五波啱啱開始,即係一月初嗰陣,電訊商已經為需要入住檢疫中心強制隔離檢疫嘅市民,免費提供4G同5G數據,等佢哋喺隔離期間唔會與世隔絕。
建網工程需要快狠準

大家記得農曆年後確診數字直升,政府即時拍板興建社區隔離治療設施,即係方艙醫院,而呢啲地方除咗水電煤之外,電訊服務亦都係必需品之一,事關無論係醫護人員、工作人員定係隔離治療人士,都需要同工作夥伴及親友聯絡,隔離治療人士更需要睇片解悶,所以有關當局好快就同四大網絡商聯絡,商討有關喺落馬洲河套區、啟德、青衣、前新田購物城、港珠澳大橋香港口岸、粉嶺馬適路、洪水橋、元朗潭尾及竹篙灣嘅方艙建網事宜,每個網絡商被指派負責係唔同方艙建設網絡,即係興建基站、放置訊號天線及鋪設光纖專線等,完成後再供其他網絡商接入。

據知,喺咁多個位置入面,以落馬洲河套區同啟德郵輪碼頭呢兩個位置嘅建網難度最高,前者設過萬個牀位,範圍相當廣闊;後者樓高四層,建築面積逾14萬平方米,提供超過3000個隔離單位,呢啲工程要快狠準,要喺極短時間之內就要完成,所以負責籌劃呢兩個地方嘅牽頭網絡商真係少啲實力同經驗都唔得!
5G機械人或可派用場

各大方艙醫院有完善嘅流動網絡,如果只係用嚟打電話同上網就有啲嘥料,近期大家見到愈來愈多嘅5G機械人應用方案,話唔定可以喺方艙醫院大展拳腳,用佢哋幫手派藥、送餐,仲可以幫手消吓毒,可以更有效安排醫護人員嘅人手調配,令接受隔離治療嘅市民有更好嘅照顧,所以5G機械人絕對諗得過!
和記電訊香港行政總裁
古星輝

hd