古星輝 - 元宇宙的「虛」與「實」|乜都5G

舊年係元宇宙元年,自從Facebook宣佈改名為Meta後,「元宇宙」呢三個字真係紅透半邊天!香港嘅媒體同網上平台日日都見到元宇宙嘅討論。早前有電訊商就已經宣佈率先接受加密貨幣付款,可以找電話帳單數、入手電訊產品或增值服務,為客戶喺元宇宙消費提供嶄新平台。

元宇宙嘅虛擬世界,目前以區塊鏈遊戲為主,亦邁向去中心化金融發展,吸引咗唔少品牌進軍元宇宙,有啲舉行虛擬演唱會,有啲虛擬買賣土地、開設虛擬商店、售賣虛擬產品等,打造嶄新虛實並重嘅購物體驗。

元宇宙被認為係第三代互聯網(Web3.0),喺推動呢個新互聯網革命嘅過程中,電訊商嘅角色舉足輕重。元宇宙嘅虛擬世界,有賴電訊商喺現實世界為佢鋪建嘅各種基石,例如5G網絡。

喺元宇宙世界,結合VR、AR嘅穿戴,客戶即可親身感受沉浸式體驗,買嘢用加密貨幣,又可以買賣NFT,各種應用都對頻寬同網速有極高要求。所以話5G,正正係拓展元宇宙嘅其中一個重要元素。
演藝界大吹NFT風

近期市場上有唔少著名嘅運動品牌、經典卡通角色、唱片公司及時裝品牌都陸續進軍元宇宙,購買虛擬土地做地主,甚至本地最大嘅銀行同國際投行都進軍元宇宙推廣自己品牌。另一方面,演藝界近期大吹NFT風,唔少名人好似周杰倫、謝霆鋒同余文樂等都大搞NFT項目,就連久違嘅星爺早前都現身Discord同大家傾NFT,數數吓,真係有唔少機構同藝人都推動緊元宇宙同NFT嘅發展。

有研究機構預期,環球元宇宙嘅市場規模將於2028年達8290億美元。喺發展虛擬嘅元宇宙平台,背後有賴現實世界嘅電訊商同好多科企巨頭、開發商等共同努力,提供可靠穩健嘅基建、技術同應用,令呢個新經濟模式更為兼容。作為電訊商之一,我哋亦樂於倡導Web 3.0線上線下虛實世界嘅發展。
和記電訊香港執行董事及行政總裁
古星輝
更多文章